اشخاص

مہدی باکری

زینب احمدی
36 Views

مہدی باکری(1954- 1984) سپاہ پاسداران انقلاب کے 31 ویں عاشورہ ڈویژن کے کمانڈر تھے جو حور العظیم کے علاقے میں آپریشن بدر میں شہید ہوئے۔

مہدی باکری 1954ء میں مغربی آذربائیجان کے مضافاتی علاقے میان دوآب میں پیدا ہوئے۔ اپنے ہائی اسکول کے آخری سال میں، انہوں نے اپنے بھائی علی باکری کی شہادت کے ساتھ ہی سیاسی تحریک میں شمولیت اختیار کی۔ 1973ء میں وہ میکینکل انجینئرنگ کے میدان میں تبریز یونیورسٹی کی فیکلٹی آف انجینئرنگ میں داخل ہوئے اور پہلوی حکومت کے خلاف سیاسی جدوجہد جاری رکھی۔ انہوں نے 1977 میں یونیورسٹی سے گریجویشن کیا اور اسی سال انہیں موسم خزاں میں فوجی خدمات کے لئے تہران میں فرح آباد گیریژن بھیج دیا گیا۔ 1978ء میں امام خمینی (رح) کے بیرک چھوڑنے کے حکم کے بعد وہ خفیہ طور پر ارومیہ واپس آئے اور مظاہروں میں حصہ لیا۔

اسلامی انقلاب کی کامیابی اور 1979ء میں سپاہ پاسداران انقلاب کے قیام کے بعد وہ ارومیہ کور کے رکن بن گئے اور اس کی ابتدائی تنظیم سازی میں فعال کردار ادا کیا۔ انہوں نے کچھ عرصے تک انقلابی عدالت کے پراسیکیوٹر کی حیثیت سے بھی خدمات انجام دیں۔ جولائی 1980 میں، وہ ارومیہ کی واٹر فلٹریشن آرگنائزیشن کے بورڈ آف ڈائریکٹرز کے رکن بن گئے اور اسی سال اگست میں اس شہر کے میئر بن گئے۔ اس کے بعد 29 ستمبر 1980 ء کو وہ مغربی آذربائیجان کی تعمیری جہاد کونسل کے رکن بن گئے۔ اسی سال نومبر میں، وہ اشنویہ شہر اور سرحدی دیہاتوں کو آزاد کرانے کے لئے سپاہ پاسداران انقلاب میں واپس آئے اور سات ماہ تک مغربی آذربائیجان کور کی کارروائیوں کے انچارج رہے۔ اسی دوران 2 نومبر 1980ء کو ان کی شادی صفیہ مدثر سے ہوئی۔

نومبر 1980 ء میں مہدی اور ان کے بھائی حامد محاذ جنگ میں حصہ لینے کے لئے آبادان چلے گئے۔ آبادان کے اسٹیشن 7 کے محور پر ، سپاہ پاسداران انقلاب کی افواج اور آبادان قبائل نے ایک چھوٹا سا جنگجو گروپ تشکیل دیا۔ کچھ عرصے کے بعد مہدی ارومیہ واپس لوٹ آئے۔ وہاں، انہوں نے دیہی اور محروم علاقوں میں تعمیری جہاد کی سرگرمیاں جاری رکھیں، وہ کچھ عرصے کے لئے مغربی آذربائیجان کور کی کارروائیوں کے انچارج بھی رہے اور سرحدی دیہاتوں کو انقلاب مخالف گروہوں سے پاک کرانے کے منصوبے کو اپنے ایجنڈے میں شامل کیا۔ انہوں نے سلماس شہر کے مغرب میں سِرو سرحد تک ایک آپریشن بھی کیا جس کے نتیجے میں کوملہ پارٹی کے متعدد ارکان علاقے سے فرار ہوگئے۔ مجموعی طور پر، سات ماہ کی کوششوں اور شمال مغرب کے علاقوں کو محفوظ بنانے کے بعد، وہ جنوبی محاذوں کی طرف روانہ ہوگئے۔

1981 کے موسم سرما میں مہدی باکری نجف اشرف بریگیڈ کے ڈپٹی کمانڈر بنے اور انہوں نے احمد کاظمی کے ساتھ مل کر یہ بریگیڈ تشکیل دی۔ 22 مارچ 1982ء کو انہوں نے فتح المبین آپریشن میں حصہ لیا۔ فتح المبین آپریشن میں حکمت عملی کی منصوبہ بندی اور موثر عملدرآمد میں باکری کی صلاحیتیں نکھر کر سامنے آئیں۔ اس آپریشن میں انہوں نے صوبہ سمنان سمیت دیگر صوبوں میں تعمیری جہاد کی انجینئرنگ فورسز کی مدد سے پہاڑ کو کاٹ کر ایک فوجی سڑک تعمیر کی جس سے میشداغ کی پہاڑیوں کی خطرناک پیچ و خم پر مشتمل مشرقی اور مغربی راستوں کے درمیان رابطہ قائم ہوا۔ اس سڑک کے ذریعے آبنائے رقابیہ میں عراقیوں کے عقبہ پر حملہ کیا گیا اور دیگر آپریشنل راستوں کے لیے راہ ہموار کی گئی۔ اس آپریشن میں باکری نے چار بٹالینز کی کمان کی اور آپریشن کے دوران ان کی آنکھ میں چوٹ آئی۔

آپریشن بیت المقدس(مئی اور جون 1982) میں، باکری اب بھی نجف اشرف کی آٹھویں بریگیڈ کے ڈپٹی کمانڈر تھے اور احمد کاظمی کے ساتھ دو خط شکن بٹالینز کی کمان کررہے تھے۔ آپریشن کے دوسرے مرحلے میں انکی کمر زخمی ہوگئی تھی۔

جون 1982 ء کے اواخر میں مہدی باکری نے پاسداران انقلاب کے کمانڈر انچیف محسن رضائی کے حکم پر 31 ویں عاشورہ بریگیڈ کی کمان سنبھالی، جو 29 نومبر 1981 کو طریق القدس آپریشن کے لئے تشکیل دی گئی تھی۔ اس بریگیڈ میں سپاہ پاسداران انقلاب اور مغربی آذربائیجان کے بسیج رضاکار فورس کے افراد شامل تھے۔

13 جولائی 1982 ء کو انہوں نے 31 ویں عاشورہ بریگیڈ کے ساتھ رمضان آپریشن میں حصہ لیا۔ یہ آپریشن شلمچہ کے عمومی علاقے کے مغرب میں اور مشرقی بصرہ میں مچھلیوں کی فارمنگ کی نہر کے علاقے میں کیا گیا تھا۔ اسی آپریشن میں ان کو سینے پر زخم آئے تھے۔

باکری ابتدائی والفجر آپریشن (6 فروری، 1983، چیزبہ) میں 31 ویں عاشورہ ڈویژن کے کمانڈر کی حیثیت سے موجود تھے۔

آپریشن والفجر 1 (10 اپریل 1983ء) میں مہدی باکری کی سربراہی میں 31 ویں عاشورہ ڈویژن، محمد رسول اللہ صلی اللہ علیہ و آلہ وسلم کی 27 ویں ڈویژن جس کی کمان رضا چراغی کے پاس تھی اور کاظم نجفی رستگار کی سربراہی میں سید الشہدا علیہ السلام کی دسویں بریگیڈ نے انجام دیا۔ اس آپریشن میں، باکری نے شناسائی کرنے والی ٹیم کے ساتھ عراقی کمین گاہوں کے نزدیکی علاقوں تک پیش قدمی کی۔

 

آپریشن والفجر 2(20 جولائی 1983، حاج عمران) میں، مہدی باکری کی کمان میں، 31 ویں عاشورہ ڈویژن نے آپریشن کے کچھ مقاصد حاصل کیے، جیسے حاج عمران گیریژن پر قبضہ کرنا، کردستان میں ضد انقلاب کی اہم گذرگاہ پر رکاوٹیں کھڑی کرنا، اور چومان مصطفی شہر کا کنٹرول حاصل کرنا شامل تھا۔

اسی سال 19 اکتوبر کو، اس ڈویژن نے وادی شیلر پر قبضہ کرنے کے ارادے سے آپریشن والفجر 4 میں بھی حصہ لیا، جس پر بالآخر قبضہ کرلیا گیا۔

باکری خیبر آپریشن (22 فروری، 1984، حر الحویزہ) کے دوران 31 ویں عاشورہ ڈویژن کے کمانڈر تھے۔ اس آپریشن میں ان کے بھائی حمید شہید ہو گئے تھے، لیکن ان کے جسد خاکی کو پیچھے منتقل نہیں کیا گیا تھا کیونکہ مہدی کا خیال تھا کہ اپنے بھائی کی لاش کو منتقل کرنے کے لئے دوسری افواج کی زندگیوں کو خطرے میں نہیں ڈالنا چاہئے۔

خیبر آپریشن کے بعد، مہدی باکری نے 31 ویں عاشورہ ڈویژن کی افواج کو تعینات کرنے کے لئے دیزفول شہر میں ایک گیریژن ڈیزائن اور تعمیر کیا، جسے بعد میں شہید بکری گیریژن کا نام دیا گیا۔

10 مارچ 1985 ء کو بصرہ-العمارہ روڈ مواصلاتی رابطہ کاٹنے، بصرہ کو دھمکانے اور ساتھ ہی خیبر آپریشن کے بقیہ مقاصد کو پورا کرنے کے ارادے سے آپریشن بدر کیا گیا۔ باکری کی کمان میں عاشورہ کی 31 ویں ڈویژن پہلی یونٹ تھی جو دریائے دجلہ کے مغرب تک پہنچنے میں کامیاب ہوئی تھی۔ اس آپریشن میں 16 مارچ 1985 کو مہدی ماتھے میں گولی لگنے سے زخمی ہو گئے تھے اور پیچھے لے جاتے ہوئے ایک مارٹر شیل انہیں لے جانے والی کشتی سے ٹکرا گیا تھا، ان کا جسد خاکی دریائے دجلہ کے پانیوں میں ہمیشہ کے لیے باقی رہ گیا۔ شہید مہدی باکری کا علامتی مقبرہ تبریز میں گلزار شہدائے وادی رحمت میں بنایا گیا ہے۔

رہبر معظم انقلاب اسلامی حضرت آیت اللہ العظمی سید علی خامنہ ای نے 27 ستمبر 1989ء کو دفاع مقدس کے متعدد شہید کمانڈروں کو تمغہ فتح سے نوازا جن میں سے ایک شہید مہدی باکری تھے۔